Este domingo, 30 de agosto, celébrase no Campo Municipal de San Andrés a XXXV edición do Trofeo Concello de Zas, unha cita que xa se converteu en toda unha tradición para o fútbol local e para a veciñanza. Seguindo a alternancia habitual entre o Sporting Zas e o CD Baio, este ano serán os primeiros os que exerzan como organizadores e anfitrións dunha das últimas probas da pretempada para ámbolos dous clubs.
A xornada constará de dous partidos. O primeiro involucra a un terceiro conxunto, o FC Xallas B feminino, que saltará ao céspede para enfrontarse ao combinado feminino sénior do Sporting Zas ás 17:00 horas. O equipo de Santa Comba sucede, deste xeito, ao Santa Cruz CF, que disputou a pasada edición do Torneo, celebrada no Platas Reinoso de Baio.
Inmediatamente despois, ás 19:15 horas, terá lugar no mesmo escenario o derbi que protagonizarán os equipos masculinos sénior do Sporting Zas e o CD Baio. O alcalde de Zas, Manuel Muíño, destaca que se trata dun “partido amigable con moita tradición e moi atractivo para os veciños e veciñas dos dous pobos, así como para a xente das voltas que se queira achegar, especialmente dende Santa Comba para animar ao seu equipo”.
O acceso ao Municipal de San Andrés para presenciar estes dous partidos será gratuíto, como vén sendo habitual nesta cita anual. “Moita xente bota de menos os domingos de fútbol durante o verán, así que esta é unha maneira moi especial de volver á rutina, xuntar á veciñanza e ver como chegan os dous clubs do Concello a unha tempada moi ilusionante”, asegura o alcalde.
