Onde comer no Concello de Zas
A mesa de Zas sabe a produto local: carnes e peixes de proximidade, horta da tempada e pasteis tradicionais que falan de memoria e territorio. Dende bares e tabernas con ambiente a restaurantes de cociña caseira así como merendeiros públicos onde desfrutar da túa comida en plena natureza, goza dunha gastronomía sinxela, honesta e feita con agarimo. Bo proveito!
Merendeiros: sabor ao aire libre
No Concello de Zas tamén se come entre carballeiras e á beira do río. Os nosos merendeiros ofrecen mesas, parrillas e sombra para que traías a túa cesta e goces dun picnic con produto local, natureza e tranquilidade. Un plan sinxelo e familiar para descubrir a Costa da Morte interior con pausa.
Pódense reservar os merendeiros?
Non. Son de uso libre por orde de chegada. Se ides en grupo, evitade horas punta e compartide o espazo.
Está permitido facer lume?
Só nas parrillas habilitadas e nunca en días de alto risco de incendios. Se hai vento forte, non o prendas.
Qué fago co lixo?
Leva contigo todos os residuos (tamén cabichas e restos de comida). Deixa mesa e parrilla limpas.
Podo levar mascotas?
Si, pero sempre controladas (con correa se hai xente). Recolle os seus excrementos e respecta as zonas de baño sinalizadas.
Podo usar leña do entorno ou lavar con deterxente no río?
Non. Trae o teu carbón/biocombustible e non empregues xabóns nin deterxentes nos cursos de auga.
Onde aparco e a quen chamo en caso de emerxencia?
Aparca só nas zonas sinalizadas. Ante incendios ou condutas perigosas, chama ao 112 (emerxencias) ou ao 085 (incendios forestais en Galicia).