O servizo de pediatría quedou descuberto dende hoxe nos Centros de Saúde de Zas e de Baio afectando a máis de 330 doentes
O Goberno Municipal de Zas mostra unha vez máis a súa preocupación pola grave situación pola que pasa o servicio de pediatría no Concello de Zas. Segundo as queixas recibidas durante estes días por moitas familias do noso municipio, o servizo de pediatría quedou vacante dende hoxe e tampouco hai previsión de que se cubra ao longo de toda a semana que vén. Esta situación obriga ás familias de Zas a desprazarse ao Centro de Saúde de Vimianzo saturando así a carteira de doentes deste facultativo ou a colapsar o servizo de urxencias cando se trata de consultas propias da atención primaria.
“Unha vez máis dende o equipo de Goberno do Concello de Zas esiximos que o SERGAS – que é a administración responsable nesta materia – restableza o antes posible este servizo e que garanta dunha vez por todas un servizo de calidade para todos os nenos e nenas do noso municipio”; sinala Manuel Muíño Espasandín, Alcalde do Concello de Zas. Ademais, o rexedor critica que en ningún momento o SERGAS se puxo en contacto co concello para dar conta da situación o que califica como unha falta de cortesía e de lealdade institucional.
A falta de pediatras que afecta a toda Galicia está a provocar dende hai tempo un alto malestar entre os veciños e veciñas do Concello de Zas. Dende o mes de xaneiro de 2018, o servizo de pediatría no Concello de Zas reduciuse a 15 horas de atención semanal repartidas nos Centros de Saúde de Zas e de Baio cando anteriormente o especialista prestaba asistencia 35 horas á semana. Unha atención que, tanto para o Goberno Municipal como para as máis de 330 cartillas afectadas, resulta insuficiente. Ademais, en varias ocasións o servizo quedou descuberto durante varios días sen previo aviso.
