O Concello de Zas e a Asociación Deportiva Monte Brondo xa están a preparar a VIII edición do Trail da Filloa que se celebrará o 2 de febreiro de 2025.
Haberá cinco probas non competitivas que se disputarán en boa parte por camiños e pistas non asfaltadas do noso municipio. Ao igual que nas pasadas edicións “as subidas ao Monte Brondo e ao Pico de Meda serán as partes máis duras e máis técnicas do percorrido”, sinalou David Fernández, da AD Monte Brondo, durante a presentación do evento que tivo lugar esta tarde no Salón de Plenos do Concello de Zas.
Todas as saídas realizaranse dende a Praza do Concello de Zas e a meta estará situada no pavillón municipal de Zas onde os participantes poderán degustar as tradicionais filloas á pedra recén feitas. As inscricións abriranse ás 20:00 horas do vindeiro 29 de novembro e poderanse realizar a través da páxina web www.empa-t.com. Ao igual que nas últimas edicións, o importe recadado destinarase á Beca da Filloa; unha axuda económica para os estudos que se destinará a un/unha estudante empadroado/a no Concello de Zas que seleccionará o departamento de Servizos Sociais municipal de forma confidencial.
Nesta edición, como novidade, haberá un “Mini Trail” de 13 quilómetros de distancia que se suma as demáis probas: trail longo (28k), trail curto (18k), andaina longa (20k) e andaina curta (12k). Todas as probas discorren por carballeiras, ribeiras do río, soutos,… con zonas de cordas que tanto gustan aos participantes e tramos novos. Haberá varios habituallamentos e servizo de duchas e de gardería gratuítos para todas as persoas participantes.
Presentación
O VIII Trail da Filloa presentouse esta tarde no Salón de Plenos do Concello de Zas nun acto no que participaron o Alcalde de Zas, Manuel Muíño; e David Fernández, da AD Monte Brondo. O rexedor animou á xente a que se apunte neste evento xa que se pode participar correndo ou camiñando. “Este é un evento que ten o seu propio oco dentro do calendario deportivo da comarca e que gusta moito a todos os participantes tanto polos diferentes atractivos do seu percorrido como pola degustación dun dos nosos pratos típicos; as filloas á pedra”, destacou o rexedor. Durante a súa intervención, Manuel Muíño recordou que o equipo de Goberno Municipal aposta polo deporte. “Estes son eventos que ademáis de promover o deporte estimulan a economía local xa que na última edición participaron unhas 1.000 persoas de diferentes puntos que quedan a comer e a durmir na zona”, destacou.
Pola súa banda, David Fernandez detallou os aspectos máis técnicos do VIII e agradeceu a colaboración dos máis de 70 voluntarios e voluntarias así como membros de Protección Civil e da Policía Local que fan posible a celebración deste evento que ano tras ano suma máis participantes.
