O 13 de maio é unha data sinalada no calendario do Concello de Zas xa que neste 2025 cúmprense 100 anos da morte de Enrique Labarta Pose. Por este motivo, o Concello de Zas, a través do seu departamento de Cultura, vén de deseñar unha programación especial na lembranza do polifacético escritor que se desenvolverá durante os vindeiros meses e que se realizará coa colaboración da comunidade educativa e do grupo de teatro Badius.
- A primeira actividade será o 26 de marzo coa lectura da obra “O segredo do Tío Sanfona” que realizará o alumnado do IES Maximino Romero de Lema no programa de Radio Escolar Vimianzo. Tamén gravarán en podcast o conto “A Compaña”.
- En abril instalaranse nas principais rúas de Baio e de Zas unha exposición conmemorativa cunha escolma de poemas de Enrique Labarta Pose.
- Coincidindo co Día Internacional do Libro, que se celebra o 23 de abril, levaremos o contacontos “O poeta do pobo” ao CPI de Zas (10:00 horas) e ao CEIP Labarta Pose (11:30 horas). Diso encargaranse os membros de “Polo Correo do Vento”.
- Un dos actos centrais desta programación especial na honra de Enrique Labarta Pose será o 13 de maio, coincidindo co día exacto do seu falecemento, e realizarase na Praza Jorge Mira Pérez de Baio a partir das 11:00 horas. Nesta conmemoración decobriremos un monumento, realizarase un acto simbólico do seu enterramento, realizarase unha ofrenda floral e farase a lectura do poema “Que me enterren aló” coa participación do alumnado do CPI de Zas, do CEIP Labarta Pose e do IES Maximino Romero de Lema.
- Algunhas obras de teatro máis relevantes escritas por Enrique Labarta Pose representaranse na tarde do domingo 25 de maio no Auditorio de Baio. O alumnado do CEIP Labarta Pose interpreterá “O tío Sanfona”, “A lingua pequena” e “Falade Galego!”; mentras que o o grupo de teatro Badius representará “Unha boa misa”.
- Durante a Semana Cultural que organiza o IES Maximino Romero de Lema realizarase un roteiro literario polo espazos bibliográficos e literarios localizados en Baio.
- E xa por último, o grupo de música local Sidhe está a traballar nestes meses na musicalización da súa obra poética que pronto poderemos escoitar.
O Concello de Zas está a realizar unha intensa labor de posta en valor da obra e figura de Enrique Labarta Pose co fin de que se lle dea o seu recoñecemento e que a Real Academia Galega lle conceda o seu propio Día das Letras Galegas.
