Pódese formalizar nos Centros Socioculturais de Zas e de Baio tanto presencialmente como telefonicamente dende hoxe e ata o vindeiro venres, 19 de xuño
Dende hoxe e ata o vindeiro venres, 19 de xuño, estará aberto o prazo de preinscrición para os campamentos infantis de verán organizados polo Concello de Zas. Por primeira vez é necesario facer unha preinscrición co fin de ter unha previsión do número de asistentes e seguir os protocolos de seguridade recomedados polas autoridades sanitarias para previr os contaxios polo Covid-19.
Estes campamentos, incluídos no programa “Zas no verán”, están dirixidos a nenos e nenas de 3 a 12 anos e teñen como obxectivo, por un lado, que as familias podan conciliar e, por outro, que os máis novos da casa desfruten do deporte, da natureza e do noso patrimonio. Os campamentos desenvolveranse no vindeiro mes de xullo repartidos en dúas quendas cun máximo de participantes por quenda.
As preinscricións pódense realizar nos Centro Sociocultural de Zas ou no de Baio, tanto de forma presencial como a través dos números de teléfono 981 75 13 98 ou 981 71 80 56. As prazas son limitadas.
