Pinchacarneiro Teatro, de Noia, trae a súa obra “Bolboretas: A Vinganza” que comeza ás 21:30 horas no Auditorio de Baio
A IV Mostra de Teatro Afeccionado “Labarta Pose” – organizada polo Concello de Zas a través da Concellería de Cultura – continúa mañá sábado, 30 de marzo, no Auditorio de Baio. Nesta ocasión será a quenda da comedia musical “Bolboretas: A Vinganza” na que o amor florece e escacha aleatoriamente. A función, que terá lugar ás 21:30 horas, está dirixida a maiores de 16 anos. Chegará da man da compañía Pinchacarneiro Teatro, de Noia, que xa participou na II edición deste certame e no acadou o 2º premio coa obra de teatro “L”.
“Bolboretas: A Vinganza” é un carrusel de primeiras citas no que se retratan as caras menos idílicas do namoramento. As bolboretas serán as encargadas de tecer os fíos desa primeira chispa e conseguirán (ou non) o romance das parellas.
Visita “Down Pontevedra Xuntos”
O público ten un papel moi importante nesta IV edición da Mostra de Teatro Afeccionado, xa que despois de cada función encargarase de valorar a obra de teatro e en función desas puntuacións outorgarase o Premio do Público.
A esta segunda función da mostra de teatro asisitirán tamén un grupo de 20 usuarios e usuarias de “Down Pontevedra Xuntos”; unha asociación de nais, pais e familiares con sede en Pontevedra e que traballa pola inclusión das persoas con Síndrome de Down. A súa estreita relación co teatro é un dos motivos que os trae esta fin de semana ao noso concello xa que moitos dos seus usuarios forman parte do grupo de teatro “Axouxere”.
A visita ao noso concello está integrada dentro do seu programa de ocio polo que durante a súa viaxe de dous días de duración aproveitarán para coñecer algúns dos espazos naturais e turísticos máis emblemáticos do noso municipio; tales como a Carballeira de Baio, as Torres do Allo, a Ponte de Brandomil ou a Arca da Piosa.
