Esta tarde púxose en funcionamento a fonte que preside este espazo público de máis de 6000 m2 dotado con zonas verdes e 75 prazas de estacionamento en pleno casco urbano da vila
Era unha vella demanda veciñal e despois de varios anos de trámites, a nova praza de Baio é unha realidade. Aínda que a sexta onda nos impide facer unha inauguración como nos gustaría, esta tarde realizouse unha sinxela presentación oficial deste novo espazo para poñelo así a disposición de toda a veciñanza.
Tal e como sinalou o Alcalde de Zas, Manuel Muíño, “hoxe é un gran día tanto para Baio como para todo o Concello de Zas xa que é unha realidade un dos proxectos de maior envergadura dos últimos anos”. Durante a presentación Muíño recordou que o procedemento foi inédito na Costa da Morte debido a que a urbanización desta área fíxose mediante a ocupación dos terreos, en lugar da expropiación que é o máis común, que figuran como adscritos a servizos públicos dentro do PXOM – Plan Xeral de Ordenación Municipal – do Concello de Zas.
Neste sentido, a construcción deste novo espazo en pleno centro de Baio ten unha dobre finalidade. Dende o punto urbanístico, integra dun xeito armónico unha zona cun gran valor medioambiental e paisaxistico coma o paseo fluvial e a carballeira co entramado urbano. E dende o punto de vista social este espazo naceu como un punto de encontro intexeracional e tamén como un lugar para o disfrute e celebración de diversos eventos tales como as festas da vila, feiras sectoriais e a propia feira de Baio que está previsto facer o traslado nun futuro próximo.
O seu deseño
Esta nova infraestructura pública ocupa un espazo de case 6000m2 e está situada en pleno casco urbano de Baio ao carón do paseo fluvial. Deseñouse seguindo as tendencias urbanísticas actuais: 100% accesible, diáfana e sostible. Ao estar catalogados eses terreos coma zona de cauce preferente por Augas de Galicia, deseñouse, en colaboración con este organismo, seguindo unhas características técnicas que permiten a rápida evacuación da auga. A praza propiamente dita ocupa unha superficie de 1500m2, está construída en forma de U, dispón de diverso mobiliario urbano móbil que a delimita e conta cunha fonte de auga de circuito pechado e transitable que se fai máis espectácular á noite debido á súa iluminación.
Ademais construíuse unha zona de aparcamento gratuíta con capacidade para máis de 75 vehículos e unha vía que da continuidade á rúa Herbais da Ponte. Desta forma mellorouse a seguridade e o tránsito do tráfico rodado e peonil da rúa Herbais da Ponte que agora é de sentido único. As zonas verdes ocupan un total de 500m2.
Todos estes traballos realizados pola empresa Lires Cons e que causaron unha enorme expectación dende o primeiro día executáronse nun tempo de marca; en escasos cinco meses.
O Concello de Zas investiu un total de 314.988,72€ neste proxecto financiados con fondos propios e sen necesidade de recurrir a ningún préstamo.
