A documentación elaborada por Xosé María Lema e Evaristo Domínguez Rial a raíz das actas municipais está publicada na páxina web do Concello de Zas
Xa se pode consultar no apartado “Zas polo Miúdo” da páxina web do Concello de Zas a cuarta parte da historia de Zas que se centra nos anos 1939 a 1978, coincidindo coa época da ditadura franquista.
Tomando como base as actas municipais, Xosé María Lema e Evaristo Lema elaboraron unha nova entrega na que se repasan algúns dos feitos máis importantes que se viviron durante esta época no noso municipio.
Coincide nesta época a inauguración dalgúns dos edificios máis emblemáticos do noso municipio hoxe en día, tales como a Casa do Concello (inaugurada o 11 de outubro de 1951) ou as Escolas Agras Regueiro (27/06/1954) que foron “costeadas por el pueblo”. Foi nesta época tamén cando se creou un consorcio para a repoboación de montes na zona do Pico de Meda e que implicaba aos veciños de Carreira ou a chegada do alumeado público a Baio (ano 1963).
Nas actas municipais tamén se recolle a instalación dun campamento militar de Infantería e Artillería no zona da ponte Lodoso, en A Cacharoza-Baio, aló por maio de 1943. Durante case toda a etapa franquista, mantívose como alcalde de Zas Manuel Montero Barreiro. Foi o rexedor de Zas con máis anos no cargo xa que gobernou durante case 45 anos.
Estes e outros moitos datos pódense consultar no apartado de “Zas polo Miúdo” da páxina web do Concello de Zas ou ben a través da seguinte ligazón: http://www.concellodezas.org/media/documentos/historia_oficial_do_concello_de_Zas_IV_parte.pdf
Neste apartado pode consultarse tamén información sobre todas e cada unha das 16 parroquias que compoñen o noso municipio e a través da cal se repasan os datos de maior interese. Este é un proxecto posto en marcha polo Concello de Zas, a través da Concellería de Cultura, e co se pretende dar a coñecer e divulgar a nosa historia.
