- Está confirmada a asistencia doutros rexedores da provincia que, xunto con Manuel Muíño, Mónica Rodríguez e José Antonio Pereira encabezarán a marcha
- A convocatoria é o 2 de setembro ás 11:30 horas diante da sede da entidade financeira na cidade coruñesa
Os Alcaldes de Zas, Vimianzo e A Baña fan un chamamento a todos os veciños e veciñas doutros concellos afectados polo peche de oficinas de Abanca para asisitir á manifestación deste xoves, 2 de setembro, ás 11:30 horas diante da sede de Abanca na Coruña.
Tal e como indicaron os rexedores na rolda de prensa que ofreceron o pasado 13 de agosto para anunciar a batería de accións conxuntas que están a levar a cabo, o peche das oficinas de Zas, Baíñas e A Baña afecta directamente a unhas 10.000 persoas destes concellos e doutros limítrofes. Os tres rexedores coinciden en que toda Galicia hai miles de persoas afectadas por estes peches polo que fan un chamamento á cidadanía para que o malestar coa entidade bancaria se visibilice na manifestación deste xoves na Coruña.
Abanca pechou doce oficinas nos últimos tres meses e ten previsto cerrar outras nove a principios de setembro. Ao longo destes días, outros rexedores da provincia confirmaron a súa asistencia á protesta deste xoves na Coruña e xunto con Manuel Muíño, Mónica Rodríguez e José Antonio Pereira encabezarán a manifestación.
