Presentación de actividades de verán nas Torres do Allo
O monumento máis visitado do Concello de Zas, o primeiro pazo galego da historia, conta desde o mes de xullo cunha variada oferta de actividades destinada a todos os públicos. Desde o día 2 de xullo, e durante todos os domingos de xullo e agosto, o grupo de Teatro Os Quinquilláns ofrece unha visita teatralizada polas Torres a partir das 19.30 horas. Para os máis cativos prográmase por primeira vez, un xogo de pistas especial que terá lugar os días 15 e 29 de xullo e 12 e 26 de agosto ás 12:30 horas. Clásica nas Torres presentará unha serie de concertos de música de violín interpretados por Kamo Petrosian, os días 14 e 21 de xullo e os 19 e 25 de agosto ás 20:30 horas. Novo tamén é o I Concurso de fotografía co móbil Enfoques do Allo, que ofrece unha bolsa de premios de 100, 75 e 50 euros para as fotos máis fermosas e cuxas bases poden consultarse na páxina web oficial As Torres do Allo
O cine tomará as Torres o 19 de agosto coa proxeción da película galega A Esmorga ás 22:30 horas, namentres que e o concerto de Xoán Curiel e Iris Grey, Ao encontro de Martín Códax, o día 27 de agosto ás 20.30 horas pechará o ciclo de actividades de verán.
Sempre é unha boa época para visitar este ben cultural rodeado dunha contorna natural e etnográfica emblemática. O horario de apertura ata o 15 de setembro é de luns a venres de 11.00 a 20.00h. e sábados e domingos de 11.00 a 21.00h. As visitas guiadas son todos os días e para todos os públicos ás 13.00 e ás 17.00h. Tanto as visitas como a entrada son de balde.
O novo teléfono de contacto do pazo é 655 716 743.
