As obras, que rematarán nos vindeiros días, afectan á zona dos vestiarios, aseos e zonas comúns
Nos próximos días rematarán os traballos de mellora que se están a realizar no pavillón municipal de Baio acometidos polo Concello de Zas e que teñen como finalidade optimizar o seu uso así como mellorar a accesibilidade e a salubridade das instalacións. As tarefas céntranse na renovación e na reordenación da zona de vestiarios, aseos e zonas comúns que afecta a un total de 320 metros cadrados. A empresa Heranosca S.L. é a encargada de executar os traballos que ascenden a 141.379,38€.
As obras consisten principalmente na mellora da distribución actual co fin de darlle resposta ás novas esixencias das instalacións e ofrecer así o máximo aproveitamento posible. Esta reforma permitirá tamén mellorar a estética destas intalacións e a súa salubridade xa que os novos acabados facilitan a limpeza e o mantemento. Para iso, realizouse a demolición dos tabiques existentes para substituílos por outros novos atendendo á nova distribución, renováronse os acabados e as carpinterías interiores e exteriores, instalouse falso teito e renovouse as instalacións eléctricas, de fontanería e de saneamento. Por outra banda, con esta reforma tamén se mellora a accesibilidade ás intalacións cumprindo así a normativa vixente.
Estes días tamén remataron as obras de seguridade e accesibilidade que se levaron a cabo na piscina municipal de Zas. Estas melloras, xunto con outras actividades que se organizan, reafirman a aposta do goberno local pola promoción do deporte e da actividade física. “Son dúas reformas moi necesarias nas nosas instalacións deportivas e coas que os usuarios e usuarias lle poderán sacar o máximo partido”; sinala Manuel Muíño, Alcalde de Zas.
