O Alcalde de Zas, Manuel Muíño; o Tenente de Alcalde, José Manuel Brenlla; e o Director de Obra, Fernando Garrido; mantiveron onte un encontro cos pais e nais dos nenos e nenas matriculados na Escola Infantil de Zas para o curso 2025-2026.
Durante a xuntanza informáronos sobre os traballos que se están a realizar actualmente no exterior e interior do edificio que teñen como obxectivo principal a mellora da eficiencia enerxética coas que se mellorarán tamén o confort e a habitabilidade do mesmo. “Para o noso equipo de Goberno é unha prioridade a mellora dos servizos e estas eran unha obras moi necesarias que nos outorgarán unhas instalacións de primeiro nivel”, destaca o Alcalde. “Grazas a esta reforma e modernización a Escola Infantil de Zas é unha das máis modernas e eficientes enerxeticamente da Costa da Morte”, sinala Muíño.
As obras, que comezaron no mes de agosto (aproveitando que o centro estivo pechado polas vacacións de verán) e que continuarán durante as vindeiras semanas, consistiron principalmente na renovación das fachadas – que se aillaron co sistema SATE -, da carpintería metálica e da cuberta. Ademáis instalouse un sistema de calefacción aerotérmico co que se reducirá notablemente o consumo enerxético do edificio e gañarase en confort.
O Concello de Zas destinou un total de 231.213,71€ a estes traballos e que se suman os traballos realizados no anos 2022 que permitiron aumentar o número de plazas coa creación de novos espazos (tales como unha cociña) e a instalación dun ascensor.
Actualmente están cubertas todas as demandas de praza e durante este curso 2025-2026 uns 40 nenos e nenas de 0 a 3 anos do noso municipio e doutros limítrofes farán uso da Escola Infantil de Zas integrada na rede pública de A Galiña Azul.
