Con motivo do Día Internacional da Eliminación da Violencia Contra as Mulleres, que se conmemora cada 25 de novembro, o Concello de Zas deseñou un programa de actividades baixo o lema “Contra as violencias, educación” que se complementa cos diferentes servizos que está a disposición de toda a veciñanza ao longo de todo o ano co propósito de loitar contra esta problemática social. Un destes servizos é o Centro de Información á Muller – CIM -; onde se ofrece información, asesoría xurídica e asistencia psicolóxica a todas as mulleres do noso municipio e doutros limítrofes como Vimianzo, Cabana, Laxe e Ponteceso.
A programación do 25N do Concello de Zas arranca mañá luns co inicio dun curso sobre a regulación emocional que se realizará todos os luns, de 18:00 a 19:30 horas, no Centro Sociocultural de Zas.
Dentro da programación do Día Internacional da Eliminación da Violencia Contra as Mulleres fíxose un especial esforzo para organizar actividades centradas nas idades mais temperás e que se levarán aos diferentes centros de ensino do noso municipio. Detallámolas a continuación:
- “Acabouse o conto: nin máis nin menos”: contacontos infantil dirixido ao alumnado de educación infantil e primeira que levaremos o luns 25 de novembro ao CEIP Labarta Pose de Baio. O mércores 27 de novembro realizarase no CPI de Zas
- “Empoderar é liberar”: tamén o 25N realizaremos unha actividade dirixida ao alumando do 3º ciclo de Primaria e ESO dos centros de ensino municipais que consisitirá na instalación de vinilos
- “Conectad@s. Relacionándonos na contorna virtual”: obradoiro dirixido ao alumando de 1º e 2º da ESO do CPI de Zas que realizaremos o 26 de novembro
- “Scape Room Virtual: Bruxas e meigas en Serra da Veiga”: actividade dirixida ao alumnado de 5º e 6º de Primaria do CEIP Labarta Pose e do CPI de Zas
A programación do 25N pecharase o sábado 30 de novembro coa obra de teatro “Sen lingua”, interpretada por Serea Teatro. Esta é unha función dirixida ao público adulto que terá lugar no Auditorio de Baio ás 20:00 horas.
