O vindeiro 7 de xuño pola tarde celebramos a X Carreira Pedestre do Concello de Zas, que está incluída no XI Circuito Correndo pola Costa da Morte no que participan outros nove municipios máis da zona.
Ao igual que nas pasadas edicións, a maior parte dos percorridos discorren por tramos combinados de asfalto e camiños de terra, pasando por lugares como o paseo fluvial de Zas no caso da 10k, o que a convirten nunha das carreiras “máis verdes” de todo o Circuito Correndo pola Costa da Morte.
Tanto o punto de saída como o de chegada estará situado na praza do Concello. Estas son as diferentes categorías e horarios de saída:
- Sub 10: 17:10 horas
- Sub 12: 17:25 horas
- 3k Contra o Cancro Absoluta: 18:00 horas
- 3k Contra o Cancro sub 14-16-18: 18:02 horas
- 10k: 18:45 horas
- Pitufos: 20:00 horas
Inscricións
O prazo de inscrición está aberto ata as 23:59 horas do vindeiro 3 de xuño e o custe é de 8€, máis 1€ de aluguer de chip. A participación nas categorías base é gratuíta sendo necesario anotarse previamente.
Na seguinte ligazón atoparedes toda a información relativa a este evento e tamén o lugar para realizar a inscrición: https://correndopolacostadamorte.com/es/web/evento/2955/
