O edificio da Escola Infantil de Zas, incluída na rede pública da Galiña Azul, pronto será un lugar cunha maior eficiencia enerxética; o que se traducirá nun menor consumo eléctrico e un maior confort para os seus usuarios e usuarias.
Para iso o Concello de Zas vén de iniciar o proceso de contratación das obras de rehabilitación enerxética do edificio que acaban de saír a licitación polo que xa está aberto o prazo para que as empresas interesadas presenten a súa oferta. Esta é unha obra na que se investirán un total de 231.213,71€, con cargo ao POS+2024 da Deputación da Coruña. Con este proxecto, o Goberno Municipal reforza o seu compromiso co benestar da nosa veciñanza, en concreto das nosas crianzas; co medio ambiente e coa conservación das instalacións municipais. “Ademais de reducir a nosa pegada ambiental, estas obras permitirán ter un edificio moito máis confortable para as nosas crianzas”, apunta o Alcalde de Zas, Manuel Muíño.
As obras, que terán un prazo de execución de tres meses, consistirán basicamente na renovación das fachadas, da carpintería e da cuberta. Con esta actuación, preténdense mellorar a envolvente térmica do edificio para reducir así o consumo enerxético actual. Así mesmo, instalarase un sistema de calefacción aerotérmico que presenta un alto nivel de eficiencia enerxética xa que a maior parte da enerxía obtense do aire e só require unha pequena fracción de electricidade.
Con esta reforma completaranse as condicións de salubridade, confort e habitabilidade do edificio destinado á Escola Infantil de Zas. As obras permitirán mellorar tamén a estética do edificio e súmase aos traballos de reforma e ampliación realizados no ano 2022 nos que o Concello de Zas investiu máis de 100.000€ dos propios fondos municipais.
Dita reforma permitiu ampliar o número de prazas, dando resposta así á demanda veciñanza, e melloráronse notablemente os servizos coa instalación dun ascensor, modificouse a pranta baixa para facela máis funcional, creouse unha zona de agarda para os pais/nai, aumentouse a cociña e renovouse o seu mobiliario, realiaronse un vestiarios e creouse unha sala de descanso para o persoal.
