Dende hoxe e ata o vindeiro 7 de abril está aberto o prazo para participar na oitava edición da Mostra de Teatro Afeccionado “Labarta Pose” organizada polo Concello de Zas a través do seu departamento de Cultura.
Unha das principais novidades deste ano é que o xurado outargaralle un premio especial “Centenario Labarta Pose” dotado con 500€ que se lle outorgará á mellor comedia en homenaxe a Labarta e tendo en conta que na súa obra está moi presente a comedia. Este recoñecemento fai que a cuantía total dos premios ascenda a 4.400€.
Coma sempre, o Concello de Zas pretende a través deste certame fomentar o teatro afeccionado e o teatro feito en galego. Polo que poderán participar todas aquelas compañías e/ou grupos galegas de teatro afeccionado. Ao final desta nova poden consultarse as bases do certame e descargar os anexos a cubrir. Esta información tamén se pode consultar no Tablón de Anuncios da Sede Electrónica do Concello de Zas a través da seguinte ligazón: https://sede.concellodezas.org/sxc/es/informacion/tablon/2025/ANUNCIO_PROG_20250224143044394.html
Alí tamén se poden descargar as fichas de inscrición sendo o 7 de abril a data límite para tramitar a inscrición. Unha vez recibidos todos os traballos, un xurado formado por membros do Concello de Zas e do grupo de teatro Badius seleccionará as obras finalistas que se representarán os días 26 de abril, 3, 10, 17 e 24 de maio. O 31 de maio será a entrega de premios. As representacións serán no Auditorio de Zas e no de Baio.
4.400€ en premios
Os premios repartiranse da seguinte maneira:
- Premio á mellor obra elixida polo xurado: 900€, trofeo e diploma acreditativo
- Premio á segunda mellor obra elixida polo xurado: 700€, trofeo e diploma acreditativo
• Premio á terceira mellor obra elixida polo xurado: 700€, trofeo e diploma acreditativo
• Premio á cuarta mellor obra elixida polo xurado: 700€, trofeo e diploma acreditativo
• Premio á quinta mellor obra elixida polo xurado: 700€, trofeo e diploma acreditativo
- Premio á mellor obra elixida polo público: 200€, trofeo e diploma acreditativo
- PREMIO ESPECIAL CENTENARIO LABARTA POSE: 500€, trofeo e diploma acreditativo
O mellor actor e a mellor actriz desta sétima edición da mostra tamén recibirán cadanseu trofeo e diploma acreditativo.
