O sábado 24 de xaneiro ás 20:30 horas, o Auditorio de Baio acolle “Neura”, unha comedia de Teatro De Ste Xeito producións que pon o foco na saúde mental dun xeito moi próximo e recoñecible: con esas pequenas “neuras” do día a día que ás veces agochamos, outras veces exhibimos sen complexos, e que case sempre nos acaban condicionando máis do que nos gustaría.
En “Neura” coñecemos a Edu e Sonia, dúas persoas que xa viviron no pasado unha historia de amor e desamor… e que acabou, precisamente, por mor deses trastornos miúdos que se van acumulando. Non son amigos, non son amantes: son ese territorio difuso ao que chamamos “ex”, xente da que o sabes todo, pero coa que te comportas coma se fose unha descoñecida. E aí, nese punto incómodo e real, é onde a obra atopa a súa forza e o seu humor.
O destino fai que se volvan atopar en distintas circunstancias, obrigándoos a poñer de novo a proba a compatibilidade das súas neuras. O resultado é unha función áxil, divertida e moi humana, na que é doado verse reflectido e saír do teatro pensando (e rindo) un pouco máis do habitual. Se buscas teatro en Baio cunha comedia diferente, “Neura” no Auditorio de Baio é un plan perfecto para esa noite de xaneiro.
