Qué facer no Concello de Zas
O concello de Zas ofréceche unha ampla variedade de experiencias para gozar durante a túa estadía. Dende rutas de sendeirismo ata festas tradicionais, pasando pola súa rica gastronomía e actividades culturais, aquí atoparás plans para todos os gustos.
Rutas e natureza
Se che apaixona o contacto coa natureza, en Zas atoparás un verdadeiro paraíso verde. Cascadas como a do Rabiñoso ou sendeiros que atravesan bosques autóctonos convértense no mellor escenario para desconectar do ruído diario e respirar tranquilidade. Os amantes do sendeirismo teñen á súa disposición camiños que chegan ata miradoiros naturais e que amosan unhas panorámicas únicas do interior da Costa da Morte. Un plan perfecto tanto para unha saída en solitario como para gozar en familia ou con amigos.
Festas e tradicións
A tradición ten un lugar destacado no calendario de Zas. A Festa da Carballeira, recoñecida en toda Galicia, atrae cada ano a milleiros de visitantes que veñen gozar da música e do ambiente festivo baixo as árbores centenarias. Tamén as festas parroquiais e romarías manteñen viva a identidade cultural do concello, cunha mestura de relixiosidade, música popular e encontros veciñais que fan sentir ao visitante como un máis da comunidade.
Feiras tradicionais
Se che gusta o ambiente das feiras, en Zas tes plan todo o ano: en Baio, cada terceiro domingo de mes celébrase a feira mensual con ringleiras de postos onde atopar de todo, e tamén o primeiro martes hai mercado (con menor variedade). En Zas, o primeiro luns de mes ten lugar o mercadiño habitual, perfecto para compras de proximidade. Ademais, en xuño e setembro, Baio acolle a súa Feira de Ocasión de Coches, que reúne moito público e unha ampla oferta de vehículos.
Cultura e patrimonio vivo
En Zas a cultura respírase en cada recuncho. O teatro afeccionado, as semanas culturais e as actividades no Centro Sociocultural ofrecen propostas para todas as idades. A figura de Enrique Labarta Pose, poeta e xornalista natural de Zas, tamén ocupa un lugar destacado, con homenaxes e iniciativas que manteñen viva a súa memoria. Participar nestes eventos é mergullarse nun patrimonio cultural en constante movemento.
Gastronomía e productos locais
A boa mesa é outro dos praceres que podes descubrir en Zas. A súa hostalaría combina a tradición da cociña galega coa calidade dos produtos locais: carnes de primeira, mel da comarca ou a pataca de Coristanco, todo preparado con agarimo polos restauradores da zona. Os bares e restaurantes ofrecen desde tapas saborosas ata menús completos que permiten gozar dos sabores auténticos da terra. Probar a gastronomía local é unha das mellores formas de coñecer o espírito do concello.
Deporte e lecer activo
O Concello de Zas aposta polo deporte como estilo de vida. As súas instalacións municipais permiten practicar actividade física durante todo o ano: ximnasio, pavillóns, campos de fútbol, piscina municipal e espazos para adestrar ao aire libre. Ademais, as rutas en bicicleta ou a práctica de sendeirismo convértense en alternativas ideais para quen queira combinar turismo con exercicio físico. Zas é o destino perfecto para manterse activo rodeado dun entorno natural privilexiado.
Rutas para descubrir Zas
O Concello de Zas ofrece un conxunto de rutas cheas de historia, natureza e patrimonio que invitan a percorrer carballos centenarios, ribeiras de ríos, pazos señoriais ou antigos castros. Cada itinerario é unha oportunidade para mergullarse na paisaxe rural, coñecer a súa riqueza cultural e gozar dun destino perfecto para amantes do sendeirismo e da tranquilidade.
Consulta a nosa axenda
Para non perder ningunha novidade, podes visitar a axenda municipal, onde se recollen todas as actividades actualizadas: música, teatro, deporte, festas populares e moito máis. Entra e organiza a túa estadía en Zas ao teu gusto, escollendo os plans que máis se adapten ao que buscas.