O Concello de Zas garante que Baio seguirá contando cun servizo de Correos, evitando que a veciñanza teña que desprazarse a outros municipios para realizar as súas xestións. Esta medida fai fronte á xubilación da actual funcionaria, propietaria do local de Correos, prevista para o 31 de decembro, que podería ter provocado a perda deste servizo esencial.
Co obxectivo de evitar calquera interrupción, o Concello actuou de inmediato. En apenas 15 días desde que se recibiu o aviso, habilitouse un novo local xunto ao Centro Sociocultural de Baio, que conta coas instalacións necesarias para que a oficina poida operar con normalidade.
O novo espazo mantén o mesmo horario de atención que ata agora, abrindo de 8:30 a 11:30 horas, garantindo así a continuidade dun servizo imprescindible para a veciñanza, especialmente para persoas maiores ou con dificultades para desprazarse. Estará en funcionamento a partir de xaneiro de 2026, abrindo as súas portas o vindeiro luns, 5 de xaneiro.
A actuación incluíu a realización de pequenas obras de adecuación para adaptalo ás necesidades do servizo postal, todo co obxectivo de manter o servizo igual que ata o de agora. Grazas a este esforzo, a veciñanza de Baio poderá seguir realizando todas as súas xestións postais sen ter que desprazarse a Vimianzo ou Santa Comba, mantendo a comodidade e a proximidade do servizo.
O alcalde de Zas, Manuel Muíño, destacou que “foi unha prioridade para nós asegurar que Baio non perdese un servizo tan esencial. Sabemos o importante que é para os nosos veciños e veciñas poder realizar as súas xestións sen ter que desprazarse”. Na mesma liña, o rexedor apuntou que “o Concello fixo un esforzo importante para habilitar este novo espazo en tempo récord, demostrando que seguimos comprometidos coa defensa dos servizos públicos en todo o noso municipio. Esta actuación é un exemplo do noso compromiso co rural e coa calidade de vida da nosa veciñanza.”
