O Concello de Zas organiza o vindeiro luns 25 de agosto ás 22:00 horas a actividade “Mirada ao firmamento dende o pasado”, unha proposta pensada para toda a familia que contará co coñecido divulgador científico Jorge Mira como guía da observación astronómica.
O punto de encontro será na igrexa de Santa Sía de Roma (https://bit.ly/comochegararoma), desde onde se iniciará unha camiñada de aproximadamente 2 quilómetros ata o dolmen da Arca da Piosa, un dos monumentos megalíticos máis emblemáticos do municipio. O percorrido presenta unha dificultade baixa.
Durante a actividade, as persoas asistentes poderán contemplar o ceo nocturno e identificar as súas estrelas e constelacións máis destacadas, guiadas polas explicacións de Jorge Mira.
Recomendacións
Para unha mellor experiencia, recoméndase levar roupa de abrigo, lanterna e unha manta para poder deitarse comodamente durante a observación.
Inscricións
A participación é gratuíta, pero require inscrición previa a través do formulario dispoñible en https://bit.ly/Observacion25 ou chamando ao teléfono 981 718 056.
Con esta proposta, o Concello de Zas continúa apostando pola divulgación científica e a posta en valor do patrimonio arqueolóxico, ofrecendo actividades que combinan natureza, ciencia e cultura nunha contorna única.
Cómpre lembrar que o xeodestino Costa da Morte recibiu no ano 2023 a certificación como Destino Turístico Starlight, e que o dolmen da Arca da Piosa forma parte dos miradoiros incluídos nesta distinción.
