Os representantes da entidade entregáronlle o galardón ao Alcalde, Manuel Muíño, en sinal de agradecemento a todos os veciños e veciñas que apoian as súas reivindicacións
Membros da Coordinadora “Zas sen recortes en pediatría” entregáronlle o pasado luns ao Alcalde, Manuel Muíño, o Premio Nordés da Audiencia que recibiu a entidade pola súa loita en defender unha sanidade pública sen recortes.
O galardón recollérono no pasado mes de novembro durante a XIX gala dos Premios Nordés organizados pola Cadena Ser. “Dende o momento que recibimos o premio, tiñamos claro que non era noso. Non é para nós, senón que é de todos os veciños e veciñas de Zas e da contorna que amosaron o seu rexeitamento aos recortes no servizo de pediatría que sufrimos tanto en Zas como en moitos máis vilas galegas. Así que decidimos que o mellor sitio no que pode estar é na Casa do Concello de Zas”, sinalan dende a coordinadora.
Pola súa banda, o Alcalde de Zas, Manuel Muíño, aproveitou a ocasión para felicitar aos membros da coordinadora así como en reiterarlle o apoio do goberno local co fin de que todos os nenos e nenas de Zas reciban a atención médica que precisan.
Lazos
Precisamente, durante a súa visita ao Concello, os membros da Coordinadora presentaron outra das iniciativas que teñen en marcha co fin de recuperar as 35 horas de atención pediátrica repartidas entre os centros de saúde de Zas e de Baio. A nova iniciativa consiste no reparto de lazos de cor morada nos que se poden ler “Zas sen recortes en pediatría”.
Son os propios membros da coordinadora os encargados de repartir entre a veciñanza os lazos que doou unha das afectadas co fin de incrementar a visibilidade da problemática que están sufrindo. Os lazos tamén se poden atopar nos distintos establecementos comerciais do concello de Zas ou solicitándoos a través da páxina de Facebook de “Zas sen recortes en pediatría”.
Dende principios do mes de xuño, o especialista en pediatría presta asistencia en días alternos nos centros de saúde de Zas e Baio entre as 12:00 e as 15:00 horas cando até o de agora o facía de 08:00 a 15:00 horas. Esta reducción de horas obriga ás familias a recorrer aos servizos de urxencias para solucionar calquera de atención primaria.
