O Concello de Zas continúa desenvolvendo as súas políticas municipais de apoio ás familias e ao estudantado a través do programa de becas propias, unha iniciativa consolidada que ten como obxectivo favorecer a igualdade de oportunidades e contribuír aos gastos derivados da educación en todas as etapas formativas.
A comisión avaliadora das becas propias do Concello de Zas celebrou xa a súa correspondente reunión e acordou a concesión das axudas, que serán ingresadas directamente nas contas das persoas beneficiarias nos vindeiros días, conforme ao procedemento establecido polo Concello, facilitando así que o apoio económico chegue no momento no que máis se precisa.
Neste ano, o Concello de Zas destina un total de 29.100 euros, dos 30.000 orzamentados, repartidos entre 180 becas, consolidándose como o concello da Costa da Morte que máis fondos inviste por habitante neste tipo de axudas. Cunha poboación actual de 4.199 habitantes, o investimento municipal supera os 6,9 euros por veciño, reforzando unha política clara de apoio á educación, á cultura e aos servizos sociais.
Do total das becas concedidas, 15 corresponden a estudos universitarios, cun importe de 360 euros cada unha; 31 a bacharelato e ciclos superiores, de 180 euros; 68 a alumnado de ESO e ciclos medios, de 150 euros; e 66 a educación primaria, cunha axuda de 120 euros.
Zas sitúase tamén entre os primeiros concellos en facer efectivas estas becas, unha decisión que facilita a conciliación económica das familias e garante que o apoio chegue cando resulta máis necesario.
O alcalde de Zas, Manuel Muíño, destacou que “este esforzo económico amosa unha vez máis que a educación é unha prioridade absoluta para este goberno municipal. Apostar polas becas é apostar pola igualdade de oportunidades e por aliviar a carga económica das familias, sen deixar a ninguén atrás”.
Muíño subliñou tamén que “somos un concello pequeno, pero cunha xestión responsable que nos permite investir nas persoas e no futuro, mantendo ao mesmo tempo uns dos impostos máis baixos da comarca”, e engadiu que “queremos que o apoio chegue cando realmente fai falta, por iso somos dos primeiros en facer efectivas estas axudas”.
