O Concello de Zas e a Fundación Brandomil poñen en marcha, un ano máis, o programa de visitas guiadas de verán ao patrimonio histórico e arqueolóxico de Brandomil.
Esta iniciativa, xa consolidada no calendario cultural e turístico do municipio, ten como obxectivo dar a coñecer a riqueza patrimonial desta contorna única. Como novidade desta edición, increméntase a frecuencia das visitas, que pasarán a realizarse os luns, mércores e venres ás 12:00 horas, fronte ao único día ofertado en anos anteriores. As visitas desenvolveranse entre o 15 de xuño e o 31 de agosto e serán totalmente gratuítas, aínda que é necesaria a inscrición previa a través do formulario https://bit.ly/visitasbrandomil25 ou chamando ao 981 71 80 56. Tamén se ofertan visitas concertadas para grupos fóra dos días establecidos.
Este programa de divulgación patrimonial representa un compromiso firme coa posta en valor do legado histórico de Brandomil, promovendo tanto o seu coñecemento como a súa protección, ao tempo que se dinamiza a actividade turística e cultural do municipio.
