Ante as informacións aparecidas nos últimos días e a nota difundida polo PSdeG-PSOE de Zas respecto ao permiso de investigación mineira ‘Jorge Reyes’ na zona de Fornelos, o Concello de Zas considera necesario realizar as seguintes aclaracións co obxectivo de evitar confusións e garantir unha información rigorosa á veciñanza.
En primeiro lugar, o Concello reitera que o expediente ao que se fai referencia corresponde a unha fase de investigación mineira, tal e como consta na publicación oficial do Diario Oficial de Galicia (DOG), e non a unha concesión de explotación.
Así mesmo, cómpre insistir en que a tramitación, avaliación e resolución deste tipo de permisos é competencia exclusiva da Xunta de Galicia, a través da consellería competente en materia mineira. O Concello non participa na súa autorización nin dispón da capacidade de modificala ou resolvela.
En relación coa solicitude de información rexistrada polo grupo municipal do PSdeG-PSOE de Zas, o Concello aclara que dita petición se produce con posterioridade á difusión pública do asunto nos medios de comunicación, o que contribuíu a xerar interese e preocupación na veciñanza. En todo caso, o Concello atenderá e responderá ás cuestións que sexan da súa competencia, dentro dos límites legais do procedemento e da información dispoñible.
O Goberno municipal quere deixar claro que, desde o momento da publicación no DOG, estase a facer seguimento do expediente e recompilando información técnica, co obxectivo de coñecer con precisión o alcance da actuación prevista.
Neste sentido, o Concello xa conta con documentación cartográfica que permite identificar a área afectada na zona de Fornelos, e está a traballar para que esta información poida ser explicada con claridade á veciñanza.
Este martes, 2 de xuño, está prevista unha reunión co presidente da Asociación de Veciños ‘A Fonte’ de Fornelos, no marco do traballo de contacto directo coa cidadanía. No caso de considerarse oportuno, valorarase a convocatoria dunha reunión informativa aberta á veciñanza, co obxectivo de explicar a situación con transparencia e resolver dúbidas.
O Concello de Zas lamenta a confusión xerada arredor deste asunto e lembra que a publicación no DOG responde a un procedemento administrativo regulado, que non implica autorización de explotación nin actuación inmediata no territorio.
Por todo isto, o Goberno local considera importante que a información sexa tratada con rigor e que as consultas sobre o procedemento sexan dirixidas á administración competente, isto é, a Xunta de Galicia, responsable da súa tramitación.
O Concello continuará a traballar con responsabilidade, discreción e transparencia, poñendo a disposición da veciñanza toda a información que legalmente poida ser compartida e mantendo a súa interlocución directa co tecido veciñal do municipio.
