O Concello de Zas vén da dar un chanzo máis na difusión e posta en valor da figura de Enrique Labarta Pose. Nos vindeiros días todas as bibliotecas municipais dos dezasete concellos que forman a Costa da Morte terán nas súas estanterías un exemplar da “Antoloxía Poética” de Labarta e outro do primeiro libro infantil sobre o autor e que leva por título “O Poeta da Terra”. Con este envío, o Concello de Zas repartiu xa cerca de 1.000 libros sobre Enrique Labarta Pose entre bibliotecas públicas, escolares, centros de ensino e membros da Real Academia Galega.
“Labarta é coñecido en toda a comunidade galega e o que pretendemos con este envío de dous exemplares diferentes a todas as biblioteca municipais da comarca é achegar a súa obra e a súa figura a toda a veciñanza”; sinala o Alcalde de Zas, Manuel Muíño.
Os libros
A “Antoloxía Poética” de Enrique Labarta Pose recolle unha selección dos seus poemas máis destacados. Está editado por Xosé Manuel Varela e Xosé María Rei Lema e publicouse no pasado mes de maio dentro da colección de Clásicos Colección Letras Galegas da Editorial Galaxia coa colaboración do Concello de Zas.
O outro dos libros que se envía é “O Poeta da Terra”; o primeiro libro dirixido ao público infantil sobre Enrique Labarta Pose. Recolle, dun xeito moi visual, algúns dos fragmentos máis relevantes da súa obra e outros datos curiosos sobre a súa vida. O libro, que saiu á luz no pasado mes de outubro, foi publicado polo Concello de Zas e Lela Edicións.
