O Centro Sociocultural de Zas acolle o vindeiro xoves, 27 de abril, o obradoiro “Feminismos, traballo e vida. Dereito ao coidado, coidados con dereito” dirixido a todas as traballadoras do ámbito dos coidados.
O obxectivo deste taller, que se impartirá de 18:00 a 20:00 horas, é formarse sobre os dereitos laborais deste ámbito, poñendo énfase nas últimas novidades lexislativas, así como tamén fomentar a reflexión sobre os coidados, fundamentais para soster as vidas.
Esta é unha iniciativa impulsada pola área de Igualdade da Deputación da Coruña á que se suma o Concello de Zas, xunto con outros municipios da provincia, e que naceu co gallo da conmemoración do día das mulleres. Os talleres enmárcanse na campaña “É por ser muller. Loitemos por unha igualdade real” que ten como finalidade sensibilizar, visibilizar e denunciar a vulneración dos dereitos da mulleres no ámbito laboral.
Inscricións
As persoas interesadas en asistir ao taller que se impartirá o 27 de abril no Centro Sociocultural de Zas deberán anotarse previamente no Centro de Información á Muller – CIM – do Concello de Zas a través do número de teléfono 981 70 83 03 (extensión: 36).
