O Concello de Zas pon en marcha unha nova edición dos seus campamentos de Semana Santa, unha iniciativa pensada para facilitar a conciliación da vida familiar e laboral durante o período non lectivo. A proposta desenvolverase os días 30 e 31 de marzo e 1 de abril nos Centros Socioculturais de Zas e Baio, en horario de 10:00 a 14:00 horas.
Esta actividade está dirixida a nenas e nenos de entre 3 e 12 anos, ofrecendo un espazo educativo e lúdico no que as crianzas poderán gozar de distintas actividades adaptadas ás súas idades.
O Concello de Zas destaca especialmente que estes campamentos son completamente de balde, reafirmando así o seu compromiso co benestar das familias e coa igualdade de oportunidades. Trátase dunha medida que busca facilitar o acceso a este tipo de servizos a todas as familias, especialmente aquelas con menos recursos, sendo ademais un dos poucos concellos da Costa da Morte que ofrece este tipo de programas sen custo para a cidadanía.
As inscricións poderanse realizar nos centros socioculturais municipais nos seus horarios habituais: no Centro Sociocultural de Zas, de luns a venres de 9:00 a 14:00 horas; e no Centro Sociocultural de Baio, de martes a venres de 13:30 a 20:30 horas, ambas a través dos correspondentes números de teléfono, no 981 751 398 e no 981 718 056.
O alcalde de Zas, Manuel Muíño, subliña a importancia desta iniciativa: “Desde o Concello seguimos apostando por políticas útiles que dean resposta ás necesidades reais das nosas veciñas e veciños. Estes campamentos non só axudan á conciliación, senón que tamén garanten que todas as familias, independentemente da súa situación económica, poidan acceder a un servizo de calidade. É fundamental que a administración local estea ao lado da xente, e este é un claro exemplo dese compromiso”.
Muíño engade que “o feito de que sexan completamente de balde non é casual, senón unha decisión firme deste goberno municipal para apoiar ás familias e fomentar a igualdade de oportunidades desde a infancia”.
