O vindeiro mes de maio, a vila de Baio celebrará a décima edición dun dos eventos máis recoñecidos da zona, que ao longo dos anos logrou consolidarse como unha cita
ineludible para veciñanza e visitantes. O que naceu como «Baio ten a Pelota», aproveita o décimo aniversario para evolucionar agora co nome de «Baio ten as Letras», mantendo a esencia que o fixo popular e engadindo novos contidos culturais para enriquecer a proposta.
Esta transformación responde á vontade de manter vivo un evento que forma parte da identidade de Baio, apostando pola renovación con sentido, sen esquecer o pasado. A décima edición será, así, unha celebración especial que combina tradición e novidade, co obxectivo de seguir facendo medrar a vila a través da cultura, o comercio e a participación social.
Actividades principais
A programación desenvolverase os días venres 9, sábado 10 e domingo 11 de maio e incluirá os elementos que fixeron desta celebración un éxito ano tras ano:
• Descontos de ata o 20 % nas tendas locais participantes
• Ruta gastronómica de tapas nos bares da vila
• Animación nas rúas durante toda a fin de semana
• Moitas actividades infantís orientadas ao público familiar
Feira das Letras: a gran novidade
Entre as novidades desta edición destaca a posta en marcha da «Feira das Letras», que se celebrará na carpa situada na Praza Jorge Mira. Este espazo acollerá:
• Postos de venda de libros e artesanía relacionada coa lectura
• Cinco presentacións de libros a cargo de autores convidados
• Unha exposición fotográfica centrada na memoria visual do Concello
• Obradoiros infantís, como o de creación de marcapáxinas, entre outras propostas
Premios, sorteos e natureza
Como é habitual, todas as compras realizadas nos establecementos adheridos e as consumicións da ruta de tapas permitirán acumular cuños para participar en sorteos de
premios económicos ao rematar a campaña.
Ademais, organizarase unha andaina polo «Carreiro do Río», unha ruta de sendeirismo recentemente homologada. Esta actividade require inscrición previa gratuíta e rematará
cunha sesión vermú benéfica na propia Praza Jorge Mira.
Un evento organizado por BaiOn Asociación e Concello de Zas
«Baio ten as Letras» está organizado polo Concello de Zas e a recentemente creada BaiOn Asociación, unha nova entidade que xorde tras a disolución da anterior asociación de
comerciantes, coa intención de revitalizar e coordinar as iniciativas do tecido comercial local.
A nova asociación está aberta á participación de todos os establecementos de Baio que desexen formar parte dun proxecto común orientado a dinamizar a vila e fortalecer o seu
papel como referente cultural e comercial na comarca.
Toda a información relativa ao evento pode consultarse nas redes sociais oficiais da BaiOn Asociación e do Concello de Zas.
