O histórico Pazo das Torres do Allo volverá ser este outono o epicentro da festa e da tradición na Costa da Morte. O Concello de Zas convida a toda a veciñanza e aos visitantes a achegarse o vindeiro sábado 14 de novembro para desfrutar dunha nova edición do seu emblemático Magosto. O evento, organizado directamente pola Concellería de Cultura municipal, reúne cada ano a máis persoas arredor do lume e das tradicións, consolidándose como unha das citas interxeracionais de referencia no calendario comarcal.
A xornada fusionará este ano a calor do outono galego coa ilusión e a sorpresa, apostando por unha programación completa, dinámica e pensada especialmente para o goce das familias.
Ilusionismo para toda a familia con Samuel Moreno (17:00 h)
A actividade comezará ás 17:00 horas co espectáculo de maxia para público familiar a cargo de Samuel Moreno. O ilusionista achegará ao pazo unha proposta escénica moderna, dinámica e moi participativa, onde o humor, a sorpresa e o contacto constante co auditorio combinaranse para dar lugar a unha experiencia singular. A través de efectos abraiantes, momentos imposibles e un estilo fresco e actual, os espectadores pasarán a ser protagonistas activos dunha función onde nada é exactamente o que semella, garantindo un serán cargado de diversión e emoción para persoas de todas as idades.
Magosto tradicional, castañas de balde e música popular (18:00 h)
A partir das 18:00 horas prenderase a querenza pola nosa tradición co gran Magosto nas Torres do Allo. Como vén sendo habitual, o Concello de Zas disporá de castañas asadas de balde para todas as persoas que se acheguen ao recinto monumental. A degustación gastronómica estará acompañada en todo momento pola música e os bailes tradicionais grazas ás actuacións en directo de dúas formacións de referencia no tecido asociativo local:
- A Asociación Cultural Adro
- A Asociación de Baile Tradicional Churía
Ademais, ao longo de toda a tarde funcionará unha cantina atendida polo alumnado de 4º da ESO do IES Maximino Romero de Baio, co propósito de recadar fondos para a organización das súas actividades escolares e viaxe de fin de curso.
Dende o goberno local de Zas saliéntase a importancia de continuar dinamizando as Torres do Allo fóra da tempada estival, facendo do pazo máis antigo de Galicia un espazo vivo, acolledor e accesible que protexe as nosas raíces compartíndoas coa comunidade.
