Por quinta tempada consecutiva os escolares da Provincia da Coruña participan no proxecto deportivo-educativo “Aprende a través do Surfing”, desenvolto pola asociación medioambiental sen ánimo de lucro Surf and Clean en parcería coa Federación Galega de Surf e que conta co apoio da Deputación da Coruña, a Xunta de Galicia (Xogade), Ecovidrio, MSC Pesca Sostible e tamén dos concellos onde se realizan as actividades.
Dende o Concello de Zas, xunto con outros municipios da pronvincia, apostamos por preservar o mar dende a educación dos nosos estudiantes. Estes son os concellos que formamos parte deste proxecto: A Laracha, Carballo, Malpica de Bergantiños, Santa Comba, Vimianzo, Zas, Camariñas, Muxía, Fisterra e Valdoviño sumando entre todos máis dous milleiros de escolares da nosa provincia.
Escolares dende infantil a bacheralato, que ó participar neste proxecto aprenden a relacionarse mellor con elas e eles mesmos, coa demáis rapazada e o máis importante: coa súa contorna. Precisamente un dos obxectivos clave do programa é fortalecer o noso vínculo co mar, como persoas que habitamos na comunidade autónoma con máis kilometros de costa e que custodiamos un paraíso natural de ondas e praias salvaxes aínda preservadas.
Nelas o alumnado pecha os ollos e escoita, ule e sinte a mar. Nelas é máis sinxelo decatarse que a praia é un lugar antigo, dinámico e que partillamos con outros seres vivos, como os arroaces, as píllaras ou os bosques de laminarias. Un entorno a preservar.
Por iso dende abril máis de 2.300 escolares procedentes de 42 centros educativos pertencentes a 20 municipios da nosa provincia, apañan refugallo das nosas praias e aprenden a conectar e coidar o mar a través do surfing. Elas e eles son o noso futuro e xuntos, hoxe, celebramos ter unhas costas e un océano aínda cheos de vida.
Que é “Aprende a través do surfing en Galicia”?
“Aprende a través do surfing é unha comunidade conformada por unha asociación sin ánimo de lucro nomeada Surf and Clean a Federación Galega de surf, 11 escolas de surf habilitadas para impartir o proxecto: Caión Surf House, Boaola Surf Escola, Art Surfcamp, Paua Surf, One Surf Academy, Ubuntulife, Surf Costa da Morte, Narea Surf Escola, Asolas no puntal, Zorlak surf escola e Valdo surf school, 42 centros educativos e 10 concellos da provincia da Coruña: A Laracha, Carballo, Malpica de Bergantiños, Santa Comba, Vimianzo, Zas, Camariñas, Muxía, Fisterra e Valdoviño.
“Aprende a través do surfing” a nivel nacional desenvolvese tamén en: Andalucía, Illa de Menorca, Asturias e Castellón. Surf and Clean é unha asociación nacional, con sede en Galicia, que busca visibilizar o problema que xera o lixo na mar e formar axentes de cambio que a través da cultura do surf axuden a mellorar e preservar a súa saúde.
Máis información en www.aprendeatravesdelsurfing.com ou nas súas redes sociais @aprendesurfing (instagram), @aprendeatravesdelsurfing (facebook).
